Kryeministri Edi Rama ka zhvilluar sot një takim në Departamentin Amerikan të Shtetit me Sekretarin, Mike Pompeo.
Kryeministri Edi Rama është shprehur pas takimit se në në zyrën e Sekretarit të Shtetit, Mike Pompeo, folën për Rindërtimin, paketën Anti KÇK, Shengenin Rajonal dhe dialogun Kosovë – Serbi, si edhe sfidat e përbashkëta të aleancës sonë strategjike, ku Shqipëria mbetet besnikërisht e lidhur me Shtetet e Bashkuara të Amerikës.
Sekretari Pompeo u shpreh pas takimit me Kryeministrin Rama mirënjohës ndaj partneritetit të palëkundur të Shqipërisë dhe rolin e saj të lavdërueshëm si lidere e stabilitetit në Ballkanin Perëndimor.
“I gëzuar të mirëprisja sot Kryeministrin e Shqipërisë Edi Rama në Departamentin e Shtetit, ku zhvilluam një diskutim të frytshëm. Mirënjohës ndaj partneritetit të palëkundur të aleates sonë, Shqipërisë, dhe rolin e saj të lavdërueshëm si lidere e stabilitetit në Ballkanin Perëndimor”, shprehet Pompeo.
Zëdhënësja e Departamentit Amerikan të Shtetit, Morgan Ortagus bëri të ditur detaje nga ky takim ku theksoi se Shtetet e Bashkuara të Amerikës mbështesin fuqishëm përpjekjet e Shqipërisë për t’u anëtarësuar në Bashkimin Europian dhe përpjekjet aktuale për reformën në drejtësi dhe reformën zgjedhore.
Sekretari i Shtetit Pompeo dhe Kryeminstri Rama diskutuan lidhur me përparësitë e përbashkëta gjatë kryesimit nga Shqipëria të Organizatës për Siguri dhe Bashkëpunim në Europë (OSBE) për vitin 2020.
Sekretari Pompeo theksoi mbështetjen e fuqishme të Shteteve të Bashkuara për përpjekjet e Shqipërisë për t’u anëtarësuar në Bashkimin Europian dhe përpjekjet aktuale për reformën në drejtësi dhe reformën zgjedhore.
Sekretari amerikan i Shtetit vlerësoi gjithashtu Kryeministrin Rama për angazhimin e palëkundshëm të qeverisë së tij në NATO, për kundërvënien ndaj veprimtarive keqdashëse të Iranit dhe për rolin udhëheqës në rajon në mbrojtje të rrjeteve të komunikimit të gjeneratës tjetër. ATA