Trump flet si President: Do ribëjmë ëndrrën amerikane, Clinton më uroi

“Ju kërkoj ndjesë që ju mbajtëm kaq gjatë, ishte biznes i komplikuar. Mora një telefonatë nga sekretarja Clinton, ajo na përgëzoi për fitoren tonë dhe unë e përgëzova atë për fushatën ku ka luftuar fortë. Hillary ka punuar për një kohë të gjatë dhe ne i kemi borxh mirënjohjen për shërbimet. Tani ka ardhur koha që Amerika të shërojë plagët e përçarjes”, u shpreh ai.

Në vijim, Trump, deklaroi se ka ardhur koha që amerikanët të mblidhen si popull i bashkuar, ndërsa u betua para çdo qytetari se do jetë President për të gjithë.

Ai u kërkoi kujt nuk e ka mbështetur, që ta ndihmojë për të punuar me synim bashkimin e vendit.

“E jona nuk ishte fushatë por një lëvizje e përbërë nga miliona njerëz që e duan të ardhmen më të mirë për veten dhe familjen e tyre, lëvizje që bëhet nga amerikanë. Tani le të ribëjmë ëndrrën amerikane”, tha kreu i ri i Shtëpisë së Bardhë.

Ai nënvizoi se ka shpenzuar gjithë jetën në biznes duke parë potencialet e njerëzve në të gjithë botën dhe se kjo është ajo që dëshiron të bëjë për Amerikën, duke u shprehur i vendosur se asnjë njeri nuk do të harrohet.

Ai falënderoi emër pas emri mbështetësit e tij, duke u ndalur posaçërisht tek familjarët.