Organizata e Kombeve të Bashkuara (OKB) tha se një hetim ndërkombëtar në lidhje me vrasjen e gazetarit saudit Jamal Khashoggi do të ishte i mirëpritur.
Duke iu përgjigjur një pyetjeje të gazetarëve në lidhje me çështjen, zëdhënësja e Komisariatit të Lartë për të Drejtat e Njeriut në OKB, Elizabeth Throssell, tha se komisarjaMichelle Bachelet tashmë ka theksuar nevojën për një hetim të pavarur, të paanshëm dhe për llogaridhënie në vrasjen e gazetarit Khashoggi.
“Ekspertët ndërkombëtarë duhet të përfshihen në këtë proces duke u mundësuar qasje të plotë në prova dhe dëshmitarë”, tha Throssell, duke folur në lidhje me thirrjen e Turqisë për nisjen e një hetimi të pavarur ndërkombëtar.
“Ne do ta mirëprisnim një gjë të tillë”, shtoi ajo.
Throsell nënvizoi se familja e Khashoggit dhe opinioni publik duhet t’i dinë të gjitha të vërtetat mbi vrasjen dhe drejtësia duhet “medoemos” të vendoset në vend.
Ndryshe, komentet e Throssell vijnë pasi ministri i Punëve të Jashtme të Turqisë, Mevlut Çavushollu (Mevlüt Çavuşoğlu) më herët kishte deklaruar në një program në televizionin CNN se një hetim ndërkombëtar mbase do të ishte më i dobishëm, pasi, siç tha ai, Arabia Saudite deri më tani nuk i ka ofruar Turqisë informacione dhe bashkëpunim të kënaqshëm.
“Turqia do të bashkëpunonte nëse inicohet hetim ndërkombëtar”, ka thënë kryediplomati turk./trt.shqip/
