Stevo Pendarovski, kandidat i Social-Demokratëve të kryeministrit, Zoran Zaev, është fitues i zgjedhjeve presidencialë në Maqedoninë e Veriut.
Sipas rezultateve të shpallura rreth mesnatës, ai fitoi 51.71 për qind të votave, ndërsa kandidatja e VMRO-DPMNE-së, Gordana Siljanovska Davkova, mori 44.68 për qind.
Sipas Komisionit Shtetëror të Zgjedhjeve, në votime morën pjesë 46.63 për qind e rreth 1.8 milion qytetarëve me të drejtë vote.
Duke shpallur fitoren e tij, Stevo Pendarovski tha se do të jetë president i të gjithëve. Ndërsa kryeministri Zoran Zaev, tha se Maqedonia e Veriut zgjodhi të dielën një president evropian.
“Nga sot asgjë nuk është njësoj. Nga sot askush nuk do të mund të pengojë ardhmërinë e shtetit tonë. Humbën ata që na bënin shantazh, dhe kërcënonin të ardhmen tonë”, tha kryeministri Zaev. “Dëshmuam se jemi gati për Evropën’, shtoi ai./voa
