Ministrat e Jashtëm të Shqipërisë dhe Greqisë, Ditmir Bushati dhe Nikos Kotzias, u takuan të premten në Tiranë në vazhdën e dialogut intensiv të mekanizmit dypalësh për zgjidhjen e çështjeve mes dy vendeve.
Ministrat shqyrtuan progresin e shënuar prej takimit të janarit të mbajtur në Korçë që është materializuar në një sërë zhvillimesh pozitive, tashmë të bëra publike nga palët.
Bushati dhe Kotzias u dakordësuan për hapat e mëtejshëm që do të ndërmerren në muajt e ardhshëm, në funksion të avancimit të procesit dhe gjetjes së zgjidhjeve të mirëpranuara për çështjet ende në diskutim. Ata i kushtuan një vëmendje të posaçme punës në proces për finalizimin e Dokumentit të Partneritetit Strategjik, në përputhje me vullnetin e palëve për të forcuar dimensionin evropian të marrëdhënieve shqiptaro-greke.
Ministri i Jashtëm Bushati, përpara takimit me homologun e tij grek para mediave nuk komentoi anulimin e vizitës së kryeministrit grek, i planifikuar në prill, por foli për vijimin e punës në organizimin e tij.
“…Punojmë edhe për takimin e nivelit të lartë, pra për takimin e dy kryeministrave…”.
Ndërkaq Ministri Bushati deklaroi për disa progrese që janë dukë u bërë me palën greke…
Çështjet që kanë mbetur ende në tryezë, janë:
1.Marrëveshja e detit,
2.Çështja e minoritetit grek dhe zbatimi i dispozitave të ligjit të ri për pakicat kombëtare,
3- Heqja e ligjit të luftës,
Të pazgjidhura mbeten gjithashtu edhe çështja e librave shkollorë, për emërtimet ‘Çamëri’ dhe ‘Shqipëri e Madhe’, për të cilat pala greke insiston të hiqen, demarkacioni i kufijve tokësore dhe hartimi i një marrëveshjeje të re të miqësisë midis dy vendeve.
Ndërkohë në lidhje me takimin Bushati-Kotzias, ka reaguar kryetari i Partisë Drejtësi Integrim Unitet (PDIU), Shpëtim Idrizi, i cili duke iu referuar bisedimeve për çështjet e hapura mes dy vendeve thekson se çështja e shqiptarëve të Çamërisë mbështetet mbi ligjin e Parlamentit të Shqipërisë të vitit 1994, që e njeh 27 qershorin si ditën e gjenocidit mbi shqiptarët e Çamërisë dhe rezolutën për çështjen çame.
Që nga muaji nëntor i vitit të kaluar mes zyrtarëve të Ministrisë për Evropën dhe Punët e Jashtme të Shqipërisë dhe Ministrisë së Jashtme të Greqisë, janë mbajtur disa takime dhe raunde bisedimesh, mbi çështjet e hapura mes dy vendeve, me fokus arritjen e marrëveshjes për kufizimin e zonave detare dhe shfuqizimin e ligjit të luftës nga Greqia.
Ndërkohë ende nuk është konfirmuar zyrtarisht nëse do të ketë një takim mes kryeministrit të Shqipërisë, Edi Rama, dhe homologut të tij grek, Alexis Tsipras.