Në Bursën Ndërkombëtare të Turizmit (ITB) në Berlin, stenda e Shqipërisë është vizituar nga sekretari i përgjithshëm Parlamentar i Ministrisë së Zhvillimit Ekonomik të Gjermanisë, Hans-Joachim Fuchtel, si gjest i dëshmisë së mbështetjes së pakursyer të Gjermanisë ndaj reformave prioritare të Shqipërisë, si zhvillimi i turizmit të qëndrueshëm dhe mjedisit.
Ministri shqiptar i Turizmit dhe Mjedisit, Blendi Klosi, njohu zyrtarin e lartë gjerman me nismat e rëndësishme të qeverisë për zhvillimin e turizmit dhe mbrojtjen e mjedisit.
Në të dy këto sektorë, qeveria gjermane është e pranishme me financime në Shqipëri. Gjatë takimit, ministri Klosi dhe sekretari Fuchtel diskutuan për të shtuar ndihmat gjermane nëpërmjet bashkëpunimit gjerman për zhvillimin e qëndrueshëm të turizmit dhe për mbrojtjen e mjedisit në Shqipëri.
Të dyja palët ndanë mendimin se Shqipëria nuk mund të shndërrohet në një destinacion turistik evropian nëse nuk mbështet turizmin te mjedisi.
Ministri Klosi zhvilloi takime të rēndësishme me përfaqësues të kompanive me emër në botë si Tui Group, Tomas Chook dhe Apollo Group, të cilat kanë shprehur interesin e lartë të prezencës me investime në hotelet dhe resortet me 4 dhe 5 yje.
“Kërkesat për turistë në Shqipëri janë trefish apo katërfish më larta se kapacatiteti që ne ofrojmë”, theksoi ministri Klosi.
Gjithashtu ai shprehu bindjen se paketa fiskale dhe lehtësirat që ofrohen për hotelet me 4 dhe 5 yje dhe për agroturizmin janë e ardhmja e turizmit shqiptar.
Një ditë më parë, ministri Klosi ishte i përzgjedhur si përfaqësues i Ballkanit për të folur në Konferencën Ministeriale të Turizmit, ku kreu i turizmit shqiptar deklaroi se tregu shqiptar duhet të jetë në bashkërendim me partnerët lokalë për të hartuar paketa të përbashkëta rajonale për tregjet e treta.
Stenda e Shqipërisë gjatë këtyre ditëve të panairit ka zgjuar kureshtjen e vizitorëve të shumtë, krahas investitorëve dhe operatorëve turistikë të mëdhenj, të cilët kanë shfaqur interesin për të investuar në Shqipëri. /ATSH
