Një operacion i madh policor po zhvillohet prej orëve të para të mëngjesit të sotëm (28 maj 2019) në Mitrovicë, ku janë ndaluar disa zyrtarëve policorë dhe qytetarë.
Operacioni po zhvillohet nga Policia e Kosovës (PK), në bashkëpunim me Inspektoratin Policor të Kosovës (IPK), si dhe nën asistimin e njësiteve tjera relevante në zbatim të urdhëresës së Gjykatës Themelore Prishtinë.
Këtij operacioni policor i ka paraprirë një hetim disa mujor i IPK-së, PK-së i udhëhequr nga Prokuroria Speciale e Kosovës, i cili ka rezultuar me dyshimin e bazuar të përfshirjes së disa zyrtareve policor dhe të disa qytetarëve në “Pjesëmarrje ose Organizim i Grupit Kriminal”, në lidhje me veprat tjera penale si; “Kontrabandim me Mallra”, “Keqpërdorim i Pozitës Zyrtare”, “Dhënie e Ryshfetit”, “Tregti e Ndaluar” etj.
Edhe përkundër hasjes në rezistencë të armatosur në Veri të Mitrovicës, operacioni policor është duke vazhduar, përfshirë arrestimin dhe kontrollin e disa lokacioneve të cilat kanë rezultuar me konfiskimin e dëshmive relevante përfshirë edhe armë të gjata.
KosovaPress referuar burimeve të saj, raporton se gjatë aksionit është plagosur një polic në Zubin Potok, i cili nuk është në rrezik për jetën.
Reagon Haradinaj, bën thirrje për qetësi
Kryeministri i Kosovës thotë se me urdhër të Prokurorit, në gjithë
Kosovën aktualisht është duke ndodhur një operacion policorë, i drejtuar
ndaj individëve të përfshirë në kontrabandë, krim të organizuar dhe
vepra të tjera kriminale.
Haradinaj: Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Operacioni u zhvillua me sukses edhe në Komunat Veriore të Kosovës. Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin./ora news.tv/
