Arabia Saudite ka mbyllur të martën vonë kufirin e saj të vetëm tokësor me Katarin.
Siç bën të ditur televizioni “Al-Jazeera” me seli në Doha, Pika Kufitare Salwa është mbyllur përfundimisht me një qarkore të lëshuar nga Drejtoria e Doganave të Arabisë Saudite.
Kjo pikë kufitare u mbyll fillimisht më 19 qershor të këtij viti, dy javë pas një krize diplomatike që shpërtheu në Gjirin Persik më datë 5 qershor. Kufiri u rihap në gusht për kalimin e haxhilerëve kataras dhe që atëherë është mbajtur hapur kryesisht për arsye humanitare.
Qeveria saudite nuk është prononcuar ende në lidhje me këtë çështje.
Kriza e Gjirit është ajo më e keqja në dëm të rajonit që nga themelimi i Këshillit të Bashkëpunimit të Gjirit (GCC) në vitin 1981. Më 5 qershor, Arabia Saudite, Emiratet e Bashkuara Arabe, Bahrejni dhe Egjipti njoftuan shkëputjen e të gjitha marrëveshjeve diplomatike me Katarin duke i dhënë shkas fillimit të një krize të re në rajonin e Gjirit.
Anëtarët e GCC-së mbyllën hapësirën e tyre ajrore dhe portet detare për Katarin, si dhe kufirin e vetëm tokësor të vendit të vogël gadishullor me Arabinë Saudite.
Më parë gjatë kësaj jave, një takim i Këshillit të Bashkëpunimit të Gjirit në Kuvajt dështoi të afrojë ngërçin më pranë zgjidhjes.
