Dalin detaje të reja lidhur me krimin në familje të ndodhur në Shkodër, ku burri vrau me armë gjahu gruan e tij.
Rreth orës 00: 05, të natës së lënë pas, policia është njoftuar nga Beqir Xhilaj, se në banesën e tyre është vetëvrarë me armë gjahu e shoqja, Lumturie Xhilaj 45 vjeçe, banuese në fshatin Guci e Re, Njësia Administrative Rrethina Shkodër.
Nga hetimet e kryera nga policia, rezultoi se e ndjera nuk është vetëvrarë por dyshohet se e ka vrarë bashkëshorti për motive të dobëta, krim që më pas e ka pranuar edhe vetë i dyshuari.
Në këto kushte nga ana e policisë u bë arrestimi në flagrancë i 74- vjeçarit Beqir Xhilaj, banues në fshatin Guci e Re.
Në vendin e ngjarjes u gjet dhe u sekuestrua në cilësinë e provës materiale arma e gjahut të cilën e mbante me leje i dyshuari.
Gjithashtu i moshuari rreth 20 vite më parë akuzohet për vrasjen e gruas së tij të parë, ku edhe për atë akuzë ka pretenduar se ish- bashkëshortja i kishte dhënë fund jetës.
Pas shlyerjes së dënimit ai u martua sërish me Lumturie Xhilaj. Por nata mes të dielës dhe së hënës rezultoi fatale për 45- vjeçaren, e cila pati të njëjtin fat si bashkëshortja e parë e Beqirit.
Ndaj të dyshuarit vijojnë ende hetimet ndërkohë që materialet i’u referuan Prokurorisë së Shkodrës për ndjekje të mëtejshme lidhur me veprën penale të “Vrasjes për shkak të marrëdhënieve familjare”.