Kush është Ilir Meta, President i ri i Republikës së Shqipërisë?

Ilir Meta u zgjodh të premten President i 7-të Republikës së Shqipërisë pas rënies së regjimit komunist në vitin 1990…

Ilir Meta u zgjodh të premten President i 7-të Republikës së Shqipërisë pas rënies së regjimit komunist në vitin 1990.

Karriera politike 26-vjeçare e z. Meta është mjaft e pasur dhe e gjatë.

Ilir Meta lindi më 24 mars të vitit 1969 në Skrapar, Shqipëri.

U diplomua për Ekonomi Politike në Fakultetin Ekonomik të Universitetit të Tiranës. Ilir Meta ka përfunduar studimet pasuniversitare në të njëjtën fushë. Ai është që prej 15 vitesh deputet i Kuvendit të Shqipërisë dhe një nga figurat kryesore politike shqiptare. Meta konsiderohet nga media dhe publiku si krijuesi dhe drejtuesi i polit të tretë në politikën shqiptare.

Z. Meta ka një aktivitet intensiv politik duke filluar nga viti 1990 si pjesëmarrës aktiv në lëvizjen studentore, e cila përmbysi regjimin komunist. Nga viti 1992 në vazhdim, Ilir Meta është zgjedhur pa ndërprerje deputet në të gjitha legjislaturat e Kuvendit të Shqipërisë, në të cilin ka qenë anëtar i disa komisioneve dhe gjatë periudhës 1996-1997 ka mbajtur postin e Nënkryetarit të Komisionit të Politikës së Jashtme.

Ilir Meta është njëri ndër themeluesit e Forumit të Rinisë Eurosocialiste (FRESH) duke dhënë kontributin e tij për anëtarësimin e Forumit në Internacionalen e Rinisë Socialiste. Gjatë viteve të anëtarësisë së tij në FRESH, Ilir Meta ka mbajtur poste të larta drejtuese si nënkryetar (1992-1995) dhe kryetar (1995-2001).

Aktiviteti politik i Ilir Metës në strukturat e Partisë Socialiste (PS) është i ngjeshur.

Ai ka qenë anëtar i Komitetit të Përgjithshëm Drejtues nga Kongresi i Qershorit 1992 dhe anëtar i Kryesisë së Partisë nga viti 1993 deri në periudhën kur dha dorëheqjen nga kryesia e PS-së (korrik 2003), pas problemeve që ngriti pranë strukturave drejtuese të PS-së mbi mungesën e transparencës në drejtimin e qeverisë dhe partisë prej kryeministrit dhe kryetarit të atëhershëm të PS-së, Fatos Nano.

Gjatë periudhës 1997-1998, Ilir Meta ka qenë Kryetar i Partisë Socialiste të Tiranës.

Në periudhën 1993-1996, Ilir Meta ka mbajtur postin e nënkryetarit të Partisë Socialiste dhe nga 1994-1996 edhe atë të sekretarit për Marrëdhëniet Ndërkombëtare, periudhë gjatë së cilës u vendosën marrëdhënie me shumë parti socialiste dhe socialdemokrate të Evropës, si dhe Partinë Socialiste Evropiane dhe Internacionalen Socialiste.

Përveç aktivitetit politik, Ilir Meta ka dhënë leksione në Fakultetin Ekonomik të Universitetit të Tiranës, si dhe në disa akademi e universitete në Evropë dhe SHBA, ku ia vlen të përmenden Akademia Evropiane e Berlinit apo Universiteti i Harvardit.

Aktiviteti politik i Ilir Metës përfshin edhe një periudhë të suksesshme të drejtimit në qeveri, ku ka shërbyer si kryeministër i vendit gjatë periudhës nëntor 1999-shtator 2001 dhe pas fitores së zgjedhjeve parlamentare të verës së vitit 2001 u rimandatua si kryeministër gjatë periudhës shator 2001-shkurt 2002. Në këtë periudhë u shënuan arritjet më të mira të qeverisjes së vendit për periudhën e tranzicionit, stabilizimi i parametrave makroekonomike, përmirësimi i ndjeshëm i rrjetit rrugor, privatizimi i suksesshëm i disa prej sektorëve strategjikë të ekonomisë, vendosja dhe funksionimi i ligjit në të gjithë terrorin e vendit, etj.

Në shkurt 2002, për të shmangur krizën brenda mazhorancës politike dhe qeverisëse, dha dorëheqjen nga detyra.

Gjithashtu Ilir Meta ka shërbyer edhe si zv/kryeministër e ministër i Punëve të Jashtme gjatë periudhës korrik 2002-korrik 2003, zv/kryeministër dhe ministër i Integrimit gjatë periudhës tetor 1998-tetor 1999, si dhe sekretar Shteti për Integrimin Evropian në Ministrinë e Punëve të Jashtme gjatë periudhës mars-tetor 1998.

Në vitet 2003-2004, Ilir Meta ka qenë anëtar i Komisionit Ndërkombëtar për Ballkanin, i drejtuar nga ish-kryeministri i Italisë, Xhuliano Amato, komision i cili përgatiti raportin për të Ardhmen e Rajonit të Ballkanit dhe shtroi rrugën për pavarësinë e Kosovës.

Ilir Meta, pas përpjekjeve brenda strukturave drejtuese të PS-së për ndryshimin e funksionimit dhe demokracisë së brendshme në këtë forcë politike, më 6 shtator 2004, së bashku me 500 personalitete të tjera dhe intelektualë të të gjitha fushave, themeluan një forcë të re politike në Shqipëri, Lëvizjen Socialiste për Integrim (LSI).

Ilir Meta u zgjodh në krye të LSI-së në prill të vitit 2005 duke zbatuar për herë të parë parimin “një anëtar, një votë”. Ai është rikonfirmuar në krye të LSI-së në zgjedhjet e tetorit 2012 dhe së fundmi në 6 nëntor 2016.

Në periudhën shtator 2009-shtator 2010, Ilir Meta ka shërbyer si zv/kryeministër dhe Ministër i Punëve të Jashtme e më pas si zv/kryeministër dhe ministër i Ekonomisë, Tregtisë dhe Energjetikës gjatë periudhës shtator 2010-janar 2011.

Në vitin 2013, Meta u zgjodh Kryetar i Parlamentit pas fitores së koalicionit PS-LSI në zgjedhje.

Ilir Meta është i martuar me Monika Kryemadhin dhe kanë 3 fëmijë, Borën, Besarin dhe Erën.

Aktualitet