Policia e Shkodrës ka zbardhur të tjera detaje lidhur me vrasjen me armë zjarri të ndodhur paraditen e sotme në këtë qytet.
Burime nga policia bëjnë me dije se ngjarja ka ndodhur rreth orës 11:10, kohë kur është njoftuar salla operative se në rrugën që të çon tek varrezat e “Stom Golemit”, një person në një makinë, është gjetur pa shenja jete.
Shërbimet e Policisë kanë shkuar menjëherë në vendngjarje ku kanë konstatuar se në mjetin tip “Benz” me targa AA 275 BF , ndodhej trupi i pajetë i një personi.
Nga hetimet paraprake rezultoi se viktima ishte 32 vjeçari, Angjelin Shkami, banues në Shkodër, i vrarë me armë zjarri nga persona akoma të paidentifikuar.
Grupi hetimor nën drejtimin e prokurorit ndodhet në vendin e ngjarjes ku po vazhdojnë hetimet për zbardhjen e plotë të ngjarjes.
Në vendngjarje janë gjetur dhe sekuestruar tre gëzhoja pistole. Janë ngritur pika kontrolli si dhe po bëhet krehja e zonës me qëllim kapjen e autorëve.
Në mbështetje të veprimeve që po kryhen nga D.V.P. Shkodër për kapjen e autorëve, janë edhe grupe të FNSh-së.