Si iu mohohet ABC-ja fëmijëve shqiptarë në Maqedoni

Dita e Alfabetit shqiptar kaloi me shumë urime dhe manifestime të organizuara nga qeveria e Maqedonisë në muzeun e shkronjave shqipe në Manastir. Shumë politikanë përcollën mesazhe urimi për të gjithë shqiptarët  që jetojnë kudo në botë.

Por nga ana tjetër, nuk u përmend fakti që ka jo pak prej atyre nxënësve shqiptarë ende nuk iu është mundësuar të mësojnë 36 shkronjat e këtij alfabeti. Bëhet fjalë për fshatin Banjicë që bie nën administrimin e komunës Çashkë të Velesit ku fëmijët e atyshëm, ata të cilët mësojnë në shkollën fillore maqedonase “Todor Janev”. Edhe pse janë shqiptarë, ata nuk shkollohen në gjuhën amë por vetëm në maqedonisht, me alfabetin cirilik dhe historinë maqedonase, në vend të asaj shqiptare.

Ministria e Arsimit pati premtuar për zgjidhjen e këtij problemi duke thënë se do punësojë arsimtarë shqiptarë në këtë shkollë me 28 nxënës, të gjithë shqiptarë, por deri tani ky premtim nuk është realizuar.

Prindërit kujtojnë edhe pasojat që mund të vijnë si rezultat i arsimimit në gjuhë të huaj.

“Ata që fillojnë prej klasës së parë, pra duke qenë 6 vjeç, ai nuk mund ta kuptojnë as gjuhën e nënës e jo më gjuhën maqedone ose ruse..kjo është rëndë si për fëmijën, familjen e të ardhmen e tyre. Ka shumë pasoja. Nuk mundemi t’i numërojmë sa. Janë pasoja sidomos sociale”, thotë një banor i këtij fshati.

Shkolla në fshatin në Banjicë ishte mbyllur rreth 35 vite më parë. Edhe në atë kohë fëmijët shqiptarë të këtij fshati kishin mësuar në gjuhën maqedonase. Në fshatin Banjiicë jeton popullatë e përzier maqedone-shqiptare, ku sipas banorëve fshati në fjalë paraqet shembull për bashkëjetesës ndëretnike. Por çështja mbetet tek gjuha, privimi nga ajo për pjesën shqiptare. /tesheshi.com/

Aktualitet