Pas ngjarjeve që tronditën Turqinë kur nga një sulm terrorist në aeroportin ndërkombëtar Ataturk humbën jetën 45 persona, zyra britanike Foreign and Commonwealth Office (FCO) e cila ka rifreskuar hartën e vendeve të sigurta, ka konfirmuar se Shqipëria është një vend i sigurt për të udhëtuar.
Me ngjyrën jeshile, e cila i përket edhe Shqipërisë, janë përcaktuar vendet që konsiderohen si të sigurta për të udhëtuar.
Me ngjyrën e verdhë përcaktohen ato shtete ku duhet bërë kujdes gjatë udhëtimit, ndërsa me të kuqe ato vende ku rreziku është prezent në të gjithë territorin.
Qeveria britanike këshillon që të shmanget udhëtimi 10 kilometra larg kufirit me Sirinë dhe drejt qytetit Diyarbakir, e po kështu edhe në pjesën juglindore të kësaj zone.
Edhe indeksi “Indy 100” përdor informacionet e zyrës britanike FCO për të ilustruar se cilat shtete në botë konsiderohen të sigurta për të udhëtuar dhe në cilat duhet të bëhet kujdes.
Afrika dhe shtetet e Azisë konsiderohen si territoret më të rrezikshme për të udhëtuar, me nivel të lartë të terrorizmit dhe korrupsionit. Po kështu nënvizohet se duhet të bëhet kujdes në zonat e caktuara të Rusisë dhe të Amerikës së Jugut, veçanërisht në Kolumbi për shkak të virusit Zika, bandave të ndryshme të krimit të organizuar, etj.
